آخر تحديث: 4 نوفمبر 2026
مدرك موقع للدراسة. بتعطيه محاضراتك وبيشرحها إلك، فطبيعي تسأل شو بصير ببياناتك. هاي الصفحة بتجاوب بدون تعقيد.
شو بنحفظ
حسابك: اسمك، إيميلك، وكلمة السر (محفوظة مشفّرة، ما حدا منا بيقدر يقراها). لو دخلت بحساب Google، بنستلم الاسم والإيميل والصورة منه.
اللي حكيته لمدرك عن نفسك: التخصص، السنة، الجنس، واللغة اللي اخترتها.
اللي بترفعه: التسجيلات، السلايدات، الصور، الروابط، وكل اللي بيطلع منها: التفريغ، الشرح، الأسئلة، ومحادثاتك مع مدرك. التسجيل الصوتي بنحتفظ فيه عشان ترجع تسمعه.
وشوية معلومات تقنية عشان الموقع يشتغل: كم استخدمت اليوم، ومعرّف عشوائي لجهازك عشان نحدد كم جهاز بيدخل على الحساب.
ليش
عشان نشرحلك محاضراتك، ونحافظ على حسابك، ونطبّق حدود الباقة. ما بنبيع بياناتك، وما في عنا إعلانات.
مين بيشوفها
فريق مدرك بس، وبشكل محدود وقت الدعم أو لما يصير عطل.
ولمعالجة الملفات (تحويل الصوت لنص، قراءة الصور، كتابة الشرح) بنستعين بمزوّدين تقنيين. بنبعتلهم المحتوى اللي بتحتاجه المعالجة وبس.
كم بنحتفظ فيها
محاضراتك ومحادثاتك بتضل حسب باقتك: شهر للمجانية، 4 شهور للأساسية، 8 شهور للمتقدمة. بعدها بتنحذف لحالها. بتقدر تحذف أي محادثة بنفسك بأي وقت.
حقوقك
بتقدر تشوف بياناتك، تصلّحها، أو تطلب نحذف حسابك وكل شي مرتبط فيه. ابعتلنا على [email protected] وبنرد عليك بأقرب وقت.
الأمان
كلمة السر مشفّرة، والاتصال بالموقع مشفّر. بس ما في نظام آمن 100%، فلا تشارك كلمة السر مع حدا.
لو تغيّر شي
لو عدّلنا الصفحة بشكل مهم، بنغيّر التاريخ اللي فوق.